من نقطة رسوب إلى حكاية نجاح - قصتي والصدمة الأولى

أولا مبروك لكل الناجحين والناجحات في هذا المنتدى العظيم ومبروك للخريجين على وجه الخصوص

وأقول لهم بارك الله سعيكم وحقق أملكم بإذن الله







حقيقة احترت في أي مكان أحط الموضوع هذا ولكن في النهاية اخترت دا القسم ليش ما أدري

بس حسيت انو الانسب

احترت اتكلم فصيح ولا عامي ولكن في النهاية قلت خليها عامي أحسن

الظاهر الموضوع دا كلو حيرة في حيرة

يمكن لسا فيه من تبعات ليلة الامس واللي من جد كانت محيرة بالنسبة ليا وللي حواليا


طبعا امس كانت في لحظات هي الأسوء في حياتي وبعدها جات لحظات من جد حسيت فيها بقيمة الحياة وبقيمة الحبيبة وبقيمة الاهل والاصحاب

وحسيت بقيمتي


اعتقد في منكم اللي يعرف قصتي مع الفزاعة السعدان و كيف كان يحاول دائما احباطي بأي شكل

القصة بدات من سنتين لما كان يدرسنا في اول فصل محاسبي مادة المحاسبة وكان بنفس هذا الأسلوب ونفس الطريقة بس بشكل اخف يعني الشرح ميح والاسلوب سوقي

افتكر قال لي مرة وهوا يدرسني للمرة الاولى :"انت ماراح تمشي في هذا التخصص "

قلت في نفسي اوكي وعقدت العزم على اني احقق شي كبير في التخصص اللي ماكان رغبتي من البداية

سحبت ترم ايامها لظروف شخصية ولامني الكل على الشي هذا والكل قال ان ماراح ينعدل شي راح تكون انتا زي ما انتا ودرجاتك راح تكون نفسها وكلام كتير

دخلت السمستر من جديد وهمي اني احقق شي لنفسي اجتهدت وذاكرت والحمدلله خرجت في النهاية بأعلى معدل وبالإمتياز

ما اقدر اعبرلكم الفرحة كيف كانت وقتها في السمستر اللي بعدو جانا المدعو السعدان وهذي المرة مسك مادة الحاسب الآلي وانا مدري ايش مؤهلاتو لهذا الشي

اول ماشافاني قال يقولو انك نجحت ومبتسم قلتله وبإمتياز



طبعا الكل دائما يلاحظ كيف كان المدعو سعدان يحاول ينقصني في الدرجات ويرمي كلام بايخ وانا ما اعرف السبب صراحة هل احساسو بالنقص ؟

الى ان جات الصدمة لما قرأت راسب لأول مرة في حياتي كلها وفيين في مادته هوا

راجعت الدكاترة الباقين وكلهم كانو متفاجئين كيف كدا نظرا للمعدل الماضي

راجعتو وقال شد حيلك وانا ماظلمتك وما إلى ذلك من كلام كله مغلوط ومكذوب

دخلنا اختبار الاعادة وكان طبعا اصعب من السابق بكثييير وكانه يقول راح ترسبو =)

وفي الأخير رسبني


من هنا تبدء حكايتي

امس وفي العصر كنت برا البيت وجاني اتصال من احد الشباب وكان جدا فرحان انه نجح وقال لي روح شوف نتيجتك وبشرني قرأت النتيجة وكانت صدمتي جدا قوية

رسوب في مادة الحاسب واللي في المستوى السابق جبت فيها 92

عصبت زعلت بلغت اهلي بالخبر وكلي غضب عن نفسي اول مرة أشوف نفسي كدا

كسرت اشياء في البيت وصرت بالفعل وقتها في حالة محزنة ما أعرف كيف

بعدها بلحظات كنت مع اقرب الناس ليا في حياتي ووقتها بالفعل ماقدرت اتمالك نفسي


بكيت بحرقة شديدة جدا لأن عارف في قرارة نفسي اني مظلوم وحرام اللي كان انو يسير

كالعادة ربنا يحفظها ليا ويخليها معايا طول العمر حاولت بحنيتها انو تخفف عليا و تنسيني اللي سار بكل الطرق الممكنة وأنا كل مانطق لساني العاجز عن الكلام وقتها سب السعدان واهل السعدان ودعا على السعدان وتمنى من الله العلي القدير ان ينزل به أشد الإنتقام .

والدي زعل جدا وخرج من البيت امي سارت تجي الغرفة وتواسيني وتذكرني بالماضي لما لاموني على قراري وبعدين فرحتهم وبدأت تذكرني بالله وما إلى ذلك .

رجعت أغلى شي املكه في حياتي تهديني وتواسيني إلى ان هديت .

ما أخفيكم وقت الغضب قررت قرارات متسرعة وغريبة جدا :



هذي كانت قرارات متسرعة في لحظة غضب اتخذتها وقعدت ارددها لكل شخص شفتو قدامي

الا القرار الاخير طبعا مع ان نفسي يسير


قررت اني ادخل الحمام واخد دش اهدي فيه اعصابي اللي تلفت وابرد فيه زعلي .

وانا في الحمام اخدت افكر في حياتي الدراسية من بدايتها إلى يومنا هذا واكتشفت وقتها غباء قراري بترك الدراسة . فبقرار زي هذا اكون اضعت حياتي بكل ماتحمله الكلمة من معنى .

وقلت في نفسي لازم اغير من القهر اللي فيا دا واسمع كلام العقل .

قلت خليني اخرج من البيت واروح مكان تروق فيه اعصابي فطبعا مالقيت الا الكفي

وانا في الطريق فكرت بيني وبين نفسي انو خلاص لازم اجيب الترم الجاي معدل اعلى من معدل الترم هدا ومعدل الترم الماضي كمان و انا قدها وقدود ان شالله

لازم اتخرج بنسبة عالية


ربنا اراد ليا الرسوب والحمدلله على كل حال

كل شي كان مقدر ومكتوب ويمكن تأخري عن التخرج لمدة سنة يكون من صالحي بشكل كبير

والحمدلله يارب


فانا لازم احول الشي دا اللي الكل شايفو فشل واخليه حكاية نجاح حكاية الكل يتكلم عليها

يقولو كان عبدالرحمن


لازم أثبت نفسي وأثبت اني موجود وان طموحي ماتوقفه اي عثرة بإذن الله


والحمدلله على كل حال مرة تانية


طبعا وصلت الكفي وشافني حودة" وقاعد يقولي انتا متغير بئالك يومين ومش على بعضك وزعلان , فين ضحكتك فين مزحك ياد " قلتله طبعا الخبر وقام يدعي ع السعدان وقرر ان المشاريب تكون على حسابو اليوم دا .

اتصل بي واحد من الأصحاب يتطمن وشايفني اتكلم ببرود وراحة بعد مالحمدلله ارتحت وفكرت فيها . وقاعد يقولي صوتك يقول انك ناجح وانا اقلو طيب انا والله راسب واضحك ههههه

وقتها مدري كيف كان الاحساس .


.
.
.
.
.







اول شي : لما تتعثر في شي احمد الله على كل حال وثق تماما ان مافي شي مافيه فايدة
والحياة تجارب وان طول ما انتا عايش راح تحقق كل اللي تطمحله بإذن الله .



تاني شي : رضا النفس شي عظيم بالمرة وطول ما انتا راضي عن نفسك ماراح يهزك أي شي بإذن الله .



ثالث شي : كل العظماء في الدنيا هذي بدأو حياتهم بصعوبة وكافحو واجتهدو وفشلو إلين وصلو للي يتمنوه ويطمحو ليه وكل الناس سارت تذكرهم وتثني عليهم . ومافي شي بيجيك وانتا قاعد . وطول ما انتا بتجتهد بتغلط وتفشل والفشل اول خطوة للنجاح لو أستغليتو بالشكل الصحيح .

رابع شي وأهم شي : طول ما إنتا عايش وحواليك حبيبة و أم وأب وأصحاب بيحبوك ويخافو عليك وانت من اولوياتهم في الحياة دي فهذا بكل شي والله العظيم ومسكين اللي ماعنده الثلاثي الذهبي دا .

خامس شي : مصائب الدنيا وعثراتها تتعوض لكن في الاخرة مافي تعويض أبدا . نسأل الله ان نكون من المكتوبين لدخول جنته .



سادس شي : لاتفكر وانت معصب أبدا لانك راح تتخذ قرارات غبية وممكن تنفذها وتندم عليها واول شي تعمله انك تهدي نفسك بأي طريقة وتفكر بعدها بوضوح وبموضوعية وتقرر خطواتك القادمة كيف راح تكون وترسم ملامح مستقبلك بشكل ادق واوضح .




سابع شي : لو انظلمت في الدنيا دي وماقدرت تاخد حقك اعرف انو في رب فوق الجميع وراح يقتص من اللي ظلمك ان لم يكن في الدنيا فراح يكون في الاخرة .











للفرفشة